بس

بتعلم حاجات كتير عن نفسي الفترة الي فاتت و كان من اكتر الحاجات الي مسيطرة عليا هي الاحساس بالندم. و بينزل تحت البند ده حاجات كتير قوي… قوي!و لكن الدرس المستفاد هنا هو:ما تندمش علي حاجات حصلت و خلصت و مش هينفع تغير فيها حاجة. ممكن تتعلم من الي حصل، و ممكن تفهم نفسك ان في حاجات كتير موجودة في حياتك بتاخدها ك مسلمات او حاجة عمرها ما هتروح منك و بتحس بيها فقط لما تفقدها. انا مش بتكلم عن فقدان البشر بس.. انا بتكلم عن النعم اللي ربنا مديهالنا الي مهما عديناهم عمرهم ما هيخلصوا. عشان تحس بيهم اكتر، اصحي كل يوم فكر في ٥ مختلفين منهم بس…و احمد ربنا علي وجودهم. و كمان اوصيكم انكم تقولوا للناس الي بتحبوهم قد ايه هم مهمين بالنسبالكم و قد ايه انتوا بتقدروهم. متتكسفش.. قول لاهلك انك بتحبهم.. قول لاخوك و اختك و اصحابك انك بتحبهم.. قولها كتير و قولها و انت حاسسها. بحبكم و بشكركم علي دعاواتكم و علي رسايلكم و علي كلامكم الجميل الحنين. متزعلوش مني اني متأخر عليكم... انا راجع بس واحده واحده.. الحمد لله علي كل شئ.