انك تكبر دماغك ... وانك تعمل نفسك من بنها موضوع مش سهل ....تكبير الدماغ أصلا من الأخلاق ... والخلق ده أسمه التغافلالتغافل في رأيي من أهم الاخلاق الانسانية.. وخصوصا في الحياة الزوجية.التغافل يعني ايه ؟.. يعني يحصل موقف من شريك حياتك .. الموقف ده المفروض يخليك تتغدغ الدنيا ولكن انت بمنتهى الجنتلة تعمل نفسك ماخدتش بالك .. وتعديها... وممكن كمان تخلق أعذار . تخيل كده وانت قاعد بين صحابك في بيتكم .. والباب يخبط وزوجتك تفتح الباب .. ويكون حد باعتلك طبق فيه أكل ... وزوجتك تمسك الطبق قدامهم .. وهووووب ... تروح رامياه علي الأرض .. والأكل يتبعتر والطبق يتكسر .. وكل ده قصاد صحابك.طبعا لو ده حصل مع حد فينا... هانقول بعدها (الله يرحمها كانت بتبتسم وهما بيغسلوها 😄)شوف بقى النبي صلى الله عليه و سلم لما اتحط في الموقف ده عمل ايه عَنْ أُمِّ سَلَمَةَ: أَنَّهَا – يَعْنِي - أَتَتْ بِطَعَامٍ فِي صَحْفَةٍ (يعني طبق) لَهَا إِلَى رَسُولِ اللَّهِ صلى الله عليه وسلم وَأَصْحَابِهِ -فَجَاءَتْ عَائِشَةُ مُتَّزِرَةً بِكِسَاءٍ وَمَعَهَا فِهْرٌ فَفَلَقَتْ بِهِ الصَّحْفَةَ، فَجَمَعَ النَّبِيُّ صلى الله عليه وسلم بَيْنَ فِلْقَتَيْ الصَّحْفَةِ وَيَقُولُ: «كُلُوا غَارَتْ أُمُّكُمْ ». مَرَّتَيْنِ، ثُمَّ أَخَذَ رَسُولُ اللَّهِ صلى الله عليه وسلم صَحْفَةَ عَائِشَةَ فَبَعَثَ بِهَا إِلَى أُمِّ سَلَمَةَ، وَأَعْطَى صَحْفَةَ أُمِّ سَلَمَةَ عَائِشَةَ النبي صلى الله عليه وسلم أدرك ان السيدة عائشة غيرانة من ضرتها عشان كده كسرت الطبق .. راح قال لصحابه ( كلوا ... غارت أمكم) .. وجاب طبق سليم من عند السيدة عائشة وبعته للسيدة أم سلمه .. بس كده :) السؤال بقى ... إمتى نتغافل؟** نتغافل عن تصرفات شريك حياتنا لما نكون عارفين انه بيكون مش على طبيعته في أوقات معينة إسثنائية (زي وقت الحمل والبريود للزوجة - او لما يكون في مشاكل عند الزوج في الشغل - أو في يوم العيال مطلعين عين أمهم هتلاقوها اتحولت وبقت بتشد في شعرها و بتصرخ زي المجانين ... وهكذا)** نتغافل عن تصرف نتيجة شعور انساني مفهوم مش هيتغير (زي شعور الغيرة ... ولكن طبعا بحدود ) . ** لأن محدش فينا كامل.. ولما تكون عارف ان شريك حياتك فيه عيب معين .. وانت أرتبطت بيه على كده ... أول ما تلاقيه عمل حاجة نتيجة العيب اللي انت عارفه... هنا لازم تتغافل (ما دام مفيش ظلم او تعدّي) طبعا الكلام اللي فوق ده مش معناه انك تسكت عن كل الاخطاء اللي بتحصل من شريك حياتك.. في مواقف لازم تشاور له علي غلطته وتعاتبه فيها ...ومواقف تانية لازم نقف عندها قال سفيان الثوري رحمه الله: ((ما زال التغافل من فعل الكرام))وزي ما قال الشاعر ((ليس الغبي بسيّد في قومه.... لكن سيّد قومه المتغابي))
نسخ الرابط