#منقوله " حرام تصلي بالكوتشي "" حرام تصلي بالبنطلون / بالميك اب "" حرام تصلي عالأرض بدون مُصلّية "" حرام تصلي قدام الرجال "كلام زي ده بنسمعه كتير لما نصلّي في الجامعة أو أي مكان بره بيتنا .. فهل ده حقيقي ؟؟ أولًا الصلاة بالحذاء مش حرام ومش مكروه كمان بل بالعكس دي ( سُنّة ) يعني اللي يعملها بنية السُنّة ياخد أجر .. قال رسول الله ﷺ : " خالفوا اليهود فإنهم لا يُصلّون في نِعالِهم " . .هتقول طب ما الحذاء بيتنجّس واحنا ماشيين بيه في الشارع ؟ .. - شرط النجاسة إنك تشوف النجاسة دي بعينك .. يعني طالما الحذاء عليه بس تراب من الأرض يبقى طاهر ويجوز الصلاة بيه، قال رسول الله ﷺ : " إذا جاء أحدكم إلى المسجد فلينظر فإن رأى في نعليه قذرًا أو أذى فليمسحه وليُصَلّ فيهما "حد يقول هدخل اصلي في المسجد بالكوتشي عشان آخد أجر بقى ؟ - لأ ما هو هنا ما ينفعش لأن كده هتوسخ السجاد وهتئذي باقي المصلين .. لكن الصلاة بالحذاء لما تكون بتصلي على أرض أو مكان مافهوش سجاد مثلا ..وهو ينفع نصلّي عالأرض من غير مُصلّية ؟ - آه ينفع .. دي من الحاجات اللي اختص بيها ربنا أُمّة محمد ، قال رسول الله ﷺ :" أُعطِيتُ خمسًا لم يُعطَهنَّ نبيٌّ قبلي : .. وجُعِلَت لي الأرض مسجداً وطهوراً " في الأمم السابقة كان لازم يروحوا مكان مخصص للصلاة لكن ربنا أنعم على أُمّتنا إنه جعل لنا كل الأرض مسجد .. فيجوز تصلّي عالأرض طالما ما شفتش عليها نجاسة بعينك ..طيب ازاي كبنت هصلّي قدام الناس ؟ - صلاة المرأة أمام الرجال تجوز .. لو خلاص مفيش مسجد نساء فاتح والصلاة هتروح عليكي ممكن تفرشي في أي مكان على جنب ( بعيدًا عن أعين الناس بقدر المستطاع) ..:" فإن لم يُوجَد مكانٌ يستُرُها، وخشيت خروج الوقت، أو ما شابه، فلا حرجَ عليْها أن تؤدِّي الصَّلاة أمام الرِّجال الأجانب، مع الالتِزام بالسّتْر "- لقينا مكان للصلاة بس انا لابسة بنطلون او حاطة ميك اب ؟ - الصلاة بالميك اب تجوز ومافيهوش مشكلة .. المهم بس تكوني متوضية قبل الميك اب عشان ما يمنعش وصول الماء لجسمك .. طب والصلاة بالبنطلون ؟ مكروه الصلاة بيه .. بس الصلاة هتبقى صحيحة .. فالأفضل يبقى معاكي إسدال في الشنطة وتلبسيه وقت الصلاة ، لكن لو مش معاكي ما تضيعيش الصلاة وصلّي بالبنطلون عادي ..:" إذا صلى الإنسان وعورته مستورة بهذا اللباس، فصلاته في حد ذاتها صحيحة؛ لوجود ستر العورة، لكن يأثم من صَلّى بلباس ضيق " جايز يكون الصلاة بالبنطلون فيها ذنب ، لكن تأخير الصلاة عن وقتها حرام و ذنبه عظيم وكبيرة من الكبائر ..

اللهم إني أستودعك غزه واهلها وسمائها ورجالها ونساءها واطفالها وشيبها وشبابها وكل شبر في فلسطين ، اللهم كن لهم عونا ، واحفظهم من كل سوء اللهم لاترينا فيها باسا يبكينا يا رب العالمين بِسْم الله الذي لا يضر مع اسمه شيء في الارض ولا في السماء وهو السميع العليم. كررها ثلاثا

check Icon تم نسخ الرابط بنجاح