#khaledessamreviews
مراجعة فيلم " Jumanji : The Next Level " " لا يوجد حرق لأحداث الفيلم " بتبدأ احداث الفيلم بعد فترة قريبة من أحداث الجزء الاول ، و بتشوف نبذة مختصرة بزيادة عن شكل حياة ابطال قصتنا ، و ده لأن معظم الناس الى هتدخل الفيلم لا يأبهون لهذه التراهات و اهم حاجة بالنسبلهم هيا روح المغامرة و الاكشن و الكوميديا جوا اللعبة و بصراحة عندهم حق و انا كمان كنت داخل عشان كده ، بس النبذة كانت فعلا مختصرة جدا ، لكن المهم بعد كده بنلاقى سبينسر بعد لما كسر اللعبة هوا و أصحابه الشيطان لعب فى دماغة لسبب ما و راح و جمعها و قام داخل اللعبة ، فاصدقاءه لقوه اختفى و سايب موبيله جنب اللعبة ، فبعد تفكير لبعض من الثوانى اكتشفوا أنه دخل اللعبة ، فقاموا بصوا لبعض بأصرار و اتفقوا أنهم يدخلوا اللعبة عشان يرجعوه لكن بيدخل معاهم المرادى بالغلط جد سبينسر و صاحب الحج جد سبينسر ، و بس كده و بنشوف ايه هوا المهمة و الخطر إلى هيواجهوه المرادى و بتبدأ مغامرتنا ....... تنويه هام للشخص الى بيدخل يقولى انت كده محرقتش الفيلم انت كده فشخته : انا كل الى انا قولته لا يتعدى ١٠ دقائق من الفيلم و كله موجود فى الاعلانات بتاعت الفيلم . الفيلم بشكل عام فيلم فى المعقول يعنى و لا حلو لدرجة أنه هيشد انتباهك طول الساعتين و لا وحش انك هتنام فيه أو هتقول انا زهقت خلاص و عايز اقوم اروح ، لكنه فيلم حلو فى التجمعات و السهرات و احتفالات رأس السنة ، لكن نصيحة محدش يتفرج عليه غير فى سينما عادية لأنه مايستهلش الفلوس الى هتدفع فيه فاى سينما زى اى ماكس و غيرها ، عندكوا star wars نازل الاسبوع الجاى تصرفوا فلوسكوا عليه . مميزات الفيلم : اول حاجة :عجبنى فى الجزء ده أنه فيه اكشن و اشتباكات بالأيد بشكل أكبر و متنفذة بشكل حلو جدا و ميتزهقش منها خالص الحقيقة . ثانى حاجة :عجبنى برضه أن عدد الشخصيات الرئيسية فى الجزء ده اكبر و بنشوف قدرات جديدة و الخيال بقى أوسع لحد ما من الجزء الى فات . ثالث حاجة : عجبنى فى الجزء ده الناحية الإنسانية الدرامية البسيطة إلى هتشفوها فى أواخر الفيلم كده كانت معمولة بشكل حلو و انا حبيتها و مش هتكلم عنها عشان الحرق اكيد . رابع حاجة : عجبنى المشهد الى بعد النهاية عالطول إلى بيمهد لجزء جديد و حمسنى جدا الجزء الجديد و أنه هيبقى مختلف و لما تشوفوا الفيلم هاتفهموا قصدى .عيوب الفيلم : اول حاجة : معجبنيش فى الجزء ده نفس الى معجبنيش فى الجزء الى فات و اول حاجة فيهم هيا الكوميديا الى بتبقى متوقعة بشكل كبييير جدا و اى حد هيفهم ايه إلى هايحصل من قبل ما يحصل ، و الاعتماد على فكرة فرق الأحجام بين ذا روك و كيڤن هارت فى الكوميديا و خلاص الموضوع مبقاش فعال زى بداية ظهورهم فى أعمال أو لقاءات سوا خالص . ثانى حاجة : معجبنيش برضه مدة الفيلم الى واصلة لساعتين من غير ما يكون الفيلم مستاهل ده و فيه مشاهد كتير ممكن تتشال و هتفضل عايشين عادى و هنخرج من الفيلم مبسوطين . ثالث حاجة : عجبنى لحد كبير قصة الفيلم و شرير الفيلم و الأجواء المحيطة بيه و البيئة إلى هوا منها لكن معجبنيش أن مفيش اى مفاجئات و القصة ماشية و متوقعة فى كل لحظة . فيلم " Jumanji :The Next Level " فيلم ممتع و انصح الناس الى حابين يدخلوا يتفرجوا على فيلم خفيف و فيه مغامرة و كوميديا و اكشن لحد ما كل حاجة منهم حلوة يدخل يشوفه و ماظنش حد هايخرج مضايق منه خالص . تقييمى للفيلم ...... ( 6.5 / 10 ) . #KhaledEssamReviews #Jumanji
مراجعة فيلم " Joker " " لا يوجد حرق لأحداث الفيلم " قصة الفيلم بكل بساطة بتتكلم عن واحد اسمه آرثر عايش مع والدته فى مدينة غواثم ، و مصاب بداء الضحك ، و بيشتغل مهرج ، و بيحاول يتعايش مع المجتمع و التأقلم فيه مع ظروفه الاجتماعية و المرضية و التنمر إلى بيواجهة بسببهم ، و بس كده و بنتابع قصة آرثر ..... تحذير هام و معرفش ده ممكن يبقى حرق لبعض الناس و لا لا .... اوعى اوعى اوعى تدخل الفيلم ده و انت مستنى تشوف فيلم كوميكس بنفس الستايل الشائع دلوقتى ، أو انك تشوف the dark Knight تانى ، من الاخر شيل اى توقع أو امانى من دماغك ، و سيب نفسك خالص للفيلم و عيش معاه و استمتع بيه ✌️مميزات الفيلم : اول حاجة : أداء Joaquin Phoenix .... بعيدا عن تصنيفات الجوائز و الاوسكار و أيا كان ، أداء الراجل فى الفيلم كان عظيم لأبعد الحدود ، و سواء خد اوسكار السنادى أو لا ، هايفضل هوا الأداء الأفضل السنادى ، و ممكن يكون هيبقى من الأدوار المخلدة فى التاريخ ، كفاية عندى مشاهد الضحك الهستيرى الى ممكن ناس تحس انها عاوزة تضحك و هيا بتشوفها ، بالنسبالى كنت شايفها من اروع الصور الى بتصورلنا السوداوية و البؤس و المعناة و بتلخص حاجات كتير جدا . ثانى حاجة :الصورة فى الفيلم ممتازة و بتصور جواثم فى الفترة الزمنية إلى بتدور فيها الأحداث بشكل واقعى جدا ، و دى من اكتر المميزات الى فى الفيلم انك بتحس أنه حقيقى بجد و بتشوف شخصية عادية جدا و بنتابع تتطورها المنطقة خلال أحداث الفيلم ، و من ناحية تانية الكادرات و الالوان الى كانوا معبرين جدا عن الحالة النفسية للشخصية و طبيعة البيئة إلى الفيلم حاول يوصلها و نجح جدا أنه يوصلها . ثالث حاجة : الموسيقى التصويرية و اختيار الاغانى كانوا ممتازين و جذابين جدا و أضافوا كتير للمشاهد الى ظهروا فيها . عيوب الفيلم : العيب الوحيد بالنسبالى و ممكن مايكونش عيب بالنسبة لناس كتير و هوا حسيت شوية إن كان فيه مبالغة بسيطة فى التنمر إلى كان متعرض ليه فى بداية الفيلم . فيلم " Joker " فيلم جميل جدا و حقيقى جدا و فيه اداء تمثيلى ممتاز ، لكن رجاء زى ما قولت فى البوست الى كتبته عن الفيلم ماتدخلش عندك تخيل الفيلم و سيب نفسك معاه . تقييمى للفيلم ...... ( 8.5 / 10 ) . #KhaledEssamReviews #Joker
مراجعة فيلم " Joker " " لا يوجد حرق لأحداث الفيلم " قصة الفيلم بكل بساطة بتتكلم عن واحد اسمه آرثر عايش مع والدته فى مدينة غواثم ، و مصاب بداء الضحك ، و بيشتغل مهرج ، و بيحاول يتعايش مع المجتمع و التأقلم فيه مع ظروفه الاجتماعية و المرضية و التنمر إلى بيواجهة بسببهم ، و بس كده و بنتابع قصة آرثر ..... تحذير هام و معرفش ده ممكن يبقى حرق لبعض الناس و لا لا .... اوعى اوعى اوعى تدخل الفيلم ده و انت مستنى تشوف فيلم كوميكس بنفس الستايل الشائع دلوقتى ، أو انك تشوف the dark Knight تانى ، من الاخر شيل اى توقع أو امانى من دماغك ، و سيب نفسك خالص للفيلم و عيش معاه و استمتع بيه ✌️مميزات الفيلم : اول حاجة : أداء Joaquin Phoenix .... بعيدا عن تصنيفات الجوائز و الاوسكار و أيا كان ، أداء الراجل فى الفيلم كان عظيم لأبعد الحدود ، و سواء خد اوسكار السنادى أو لا ، هايفضل هوا الأداء الأفضل السنادى ، و ممكن يكون هيبقى من الأدوار المخلدة فى التاريخ ، كفاية عندى مشاهد الضحك الهستيرى الى ممكن ناس تحس انها عاوزة تضحك و هيا بتشوفها ، بالنسبالى كنت شايفها من اروع الصور الى بتصورلنا السوداوية و البؤس و المعناة و بتلخص حاجات كتير جدا . ثانى حاجة :الصورة فى الفيلم ممتازة و بتصور جواثم فى الفترة الزمنية إلى بتدور فيها الأحداث بشكل واقعى جدا ، و دى من اكتر المميزات الى فى الفيلم انك بتحس أنه حقيقى بجد و بتشوف شخصية عادية جدا و بنتابع تتطورها المنطقة خلال أحداث الفيلم ، و من ناحية تانية الكادرات و الالوان الى كانوا معبرين جدا عن الحالة النفسية للشخصية و طبيعة البيئة إلى الفيلم حاول يوصلها و نجح جدا أنه يوصلها . ثالث حاجة : الموسيقى التصويرية و اختيار الاغانى كانوا ممتازين و جذابين جدا و أضافوا كتير للمشاهد الى ظهروا فيها . عيوب الفيلم : العيب الوحيد بالنسبالى و ممكن مايكونش عيب بالنسبة لناس كتير و هوا حسيت شوية إن كان فيه مبالغة بسيطة فى التنمر إلى كان متعرض ليه فى بداية الفيلم . فيلم " Joker " فيلم جميل جدا و حقيقى جدا و فيه اداء تمثيلى ممتاز ، لكن رجاء زى ما قولت فى البوست الى كتبته عن الفيلم ماتدخلش عندك تخيل الفيلم و سيب نفسك معاه . تقييمى للفيلم ...... ( 8.5 / 10 ) . #KhaledEssamReviews #Joker
مراجعة فيلم " IT Chapter Two " " لا يوجد حرق لأحداث الفيلم " بتبدأ احداث الفيلم بعد مرور ٢٧ سنة من نهاية احداث الجزء الأول ، و مع عودة بينى وايز مرة تانية ، بيتصل مايك بالستة الباقيين عشان يرجعوا يواجهوه سوا فى مسقط رأسهم ، فبناخد فكرة سريعة جدا عن كل واحد منهم لما كبر بقى ايه شكل حياته ، و بعدين بيتجمعوا ، و بس كده و بنتابع احداث الفيلم و بنعرف اكتر عن بينى وايز و ازاى ظهر من الاساس و هل هايقدروا يهزموه المرادى و لا لا ..... مميزات الفيلم : اول حاجة : أداء Bill Skarsgard فى دور بينى وايز ، الى بيواصل تقديم الشخصية بشكل ممتاز و كل مشهد بتظهر فيه الشخصية على الشاشة بنشوفها بشكل مختلف عن الى قبلها ، بالنسبة لباقى الممثلين الى قاموا بأدوار اطفال الجزء الاول بالنسبالى ماحسيتهومش و لا اتعلقت بيهم خلال الأحداث زى اطفال الجزء الاول ، بالرغم أن أدائهم مكنش وحش خالص و كان فى مواقف حلوة كوميدية أو رومانسية لكن اسباب عدم تعلقى بيهم هقولها فى العيوب . ثانى حاجة : الفيلم ده فى مشاهد رعب كتير جدا و مختلفة جدا و فيها مزيج حلو بين الدموية و الكيانات الغربية إلى بنشوفها بتتكون خلال أحداث الفيلم و تصميمها المبهر المخيف ، و بالنسبة للناس الى شافت أن الجزء الاول مافيهوش رعب كتير أو مش الشكل الى الناس بتحبه فالفيلم ده معوضهم كتير جدا و مشاهد الرعب واحدة وقت كبير جدا من مدة الفيلم و كتير منها كان فعال جدا . عيوب الفيلم : فى الجزء ده مفيش تطور كبير فى اى حاجة فى الوقت الحاضر للشخصيات لما كبرت ، من ناحية طباع كل شخصية و مرور سنين كتير مفيش اى اختلاف و بنشوف الشخصيات الكبيرة كأنهم نفس الأطفال بس بجسم ناس كبيرة و دى حاجة مبسططنيش اوى فى الفيلم ، و بالنسبة للأحداث فافى وقت كبير من الفيلم بناءا على اتجاه خدوا الفيلم بنقضيه اننا نشوف حاجات حصلت و هما اطفال شبيه بشكل كبير الى شوفناه فى الجزء الاول ، فكان خط الأحداث الحاضر مفيهوش اى تطوير مع الوضع فى الاعتبار مدة الفيلم الى هيا حوالى ٣ ساعات ، فده خلى روح المغامرة و البناء القوى الى عشناها فى الجزء الاول و كانت واخده وقت كبير من الفيلم مع وجود رعب بس قليل مش موجودة هنا يعتبر خالص ، و الفيلم عوض ده بمشاهد رعب بأكبر قدر ممكن لو قولت فى كل مشهد ممكن مبقاش ببالغ ، فده خلى فكرة أن الواحد يتفاعل مع الشخصيات الكبيرة مش موجود اوى و لو حصل تفاعل فده لأننا شايفين روح الاطفال إلى من الجزء الاول ظاهرة قصدنا . فيلم " IT Chapter Two " بأختصار برغم العيوب الى انا قولتها هوا فيلم ممتع و انا كنت متحمسلة و قضيت وقت حلو فيه ، فالو انت زيى من الى كانوا حابين الجزء الاول بكل تفاصيلة فأنت هاتحب التانى لكن مش هتلاقى كل حاجة فى الاول موجودة فيه ، و لو انت محبتش الاول عشان مشاهد الرعب قليلة فالجزء ده مش سايب فرصة غير لو حاطت خضة فيها . تقييمى للفيلم ....... ( 7.5 / 10 ) . #KhaledEssamReviews #ITChapterTwo #ITMovie
مراجعة الموسم الثانى من مسلسل " Mindhunter" " لا يوجد حرق لأحداث الموسم " استكمالا لأحداث الموسم الاول ، بيستكمل قسم العلوم السلوكية فى المباحث الفدراليه برئاسة بيل تنش و هولدن فورد و دكتور ويندى ، مقابلتهم مع المجرمين المدانين بجرائم القتل المتسلسلة ، الى بيحللوا من خلالها دواعفهم للجرائم و سلوكهم و المنهج الى بيمشوا عليه و حاجات تانية ، و فى نفس الوقت بيطلب منهم يحققوا فى سلسلة جرائم واحدة فى مكانهم عادى و التانية فى أتلانتا ، و بس كده و بنتابع احداث الموسم و بنشوف ايه تفاصيل الجرائم دى و مين الى وراهم ، و بنشوف برضه بعض المفاجآت الدرامية .... انا متكلمتش عن الموسم الاول فهتكلم عن المسلسل ده بشكل عام : اول حاجة : أداء الممثلين ممتاز و كل واحد ليقوم بدوره زى ما هوا مطلوب منه من غير زيادة أو مبالغة ، و على حجم دوره فى الموسم يعنى مثلا التركيز الدرامى فى الجزء الثانى كبير على حياة بيل تنش العائلية اكتر من الجزء الاول و مانشوفش اى حاجة اجتماعية عن هولدن فورد زى الموسم الاول و بيبقى مشاهدة كلها معظمها مرتبطة بالتحقيقات و بس ، و دى حاجة تحسب ليهم هما الاتنين لأنهم الاكثر ظهورا على الشاشة و الاهم ، و طبعا شخصيا دكتور ويندى الى رغم أن مشاهدها مش كتيرة زى الاتنين ، لكن لما بتاخد فرصتها فى مشهد بتورينا تجسيد لطبيعة الشخصية و معناتها الداخلية إلى متعلقة بالفترة الزمنية إلى بتدور فيها الأحداث فى المجتمع الأمريكى و معاناتها فى حياتها العملية إلى شوفناها من الموسم الأول . و طبعا اى حد عمل دور مجرم اتعمل معاه مقابلة فى المسلسل أدائهم يتصنف من الجامد للجامد فشخ ، و بتجسيدهم لو بتتفرج على المسلسل لوحدك هاتحس لوهلة من القصص الى بتتحكى و تفاصيلها انك هايدخل عليك قاتل متسلسل يقتلك و انت اعد و أنه هايتفنن ازاى هايعمل ده . ثانى حاجة : و دى أهم ميزة فى المسلسل رغم كم الجرائم الى تم عرضها من الموسم الاول لنهاية الموسم الثانى الى مبنية على إحداث و مجرمين حقيقين ، إلا أن المسلسل معرضش اى حاجة من تفاصيل الجرائم دى للمشاهد و اعتمد بس على الحدوته المرعبة الى بيحكيها القاتل و ساب للمشاهد حرية تخيل كل تفصيلة فى كل جريمة و مدى بشاعتها ، و لما بقول تفاصيل فالتفاصيل هنا واصلة لأبعد مما تتخيل و المسلسل فعلا قادر يرعبك من غير و لا صورة أو خضة أو مشهد دموى . ثالث حاجة : الموسيقى التصويرية ممتازة رغم انها مش بتكون شغالة بشكل دائم لكن بدام ديفيد فينشر واحد من مخرجين المسلسل و أهمهم فالموسيقى التصويرية حاملة روحه بشكل كبير زى ما بنسمعها فى أفلامه . رابع حاجة : المسلسل بينقاش حاجات تانية خارج الجرائم زى الابعاد السياسية و الدينية و العرقية فى الفترة دى فى أمريكا و دى حاجة عملها بشكل كويس و دخلها فى الأحداث من غير ما يركز عليها بشكل مباشر . خامس حاجة : الحاجة الى ضايقتنى فى المسلسل هيا نهاية كل موسم أنه بيسيب الدنيا كلها مفتوحة و مبيقفلش غير حاجات قليلة جدا ، يعنى مبيقفليش الموسم بحدث مهم و يبدأ بعده الموسم الجديد ، و عارف ان عشان الأحداث حقيقة ممكن يكون ده مخلى الموضوع صعب ، بس ممكن برضه نقصر فى الوقت بتاع خط من الأحداث و نقفل بخط نهايته تكون مستوى الأثارة فيها اعلى . الموسم الثانى من مسلسل " Mindhunter " موسم جيد جدا و لو انت شوفت الموسم الاول فالثانى مايقلش عنه اى حاجة و هاتتبسط برضه ليه ، و لو لسه ماشوفتش اى حاجة منه و بتحب مسلسلات الجرائم و التحقيقات و الطب النفسى و ما الى ذلك و معندكش مشكلة مع الاستماع للقصص العنيفة لأعلى درجات من العنف ممكن تيجى فى بالك ، فأنصحك تتفرج عليه و مش هاتندم . تقييمى للموسم الثانى ..... ( 8.5 / 10 ) . #KhaledEssamReviews #Mindhunter #Netflix
نسخ الرابط