للمزح_فقط

- اول يوم العيد ، لازم الواحد يكون يتمتع بالحداقه والذكاء .. هو مش بس فرحة وعيديات ومسدس خرز وفُتّيش ، هاظ الحكي كان زمان يحبيبي مش هسا ...هسا عيب عليك لازم تلّف على عماتك وخالاتك لانك شب وكبير ؛ مهي راح تزعل عمتگ #زليخه وخالتك #بابونج لو ما جيت وسلمت عليهم واكلت من حلو العيد يلي عامليتو .. ف هالاشي راح يصير غصب عنك .. اجباري تخصص ، عشان هيك لازم تستعد لكل لحظة من اول يوم بالعيد ، وتخطط لكل ساعة وين بدك تقضيها ... وهالعيديات نفس الاشي ما في حدا بزيد عن الثاني ، وهالعشرين شيكل عالداير تقول جمعية ... من ٦٠ سنه وهمو بعطوا لبعض العشرين شيكل ، والمصيبة برجعولك ياها ثاني يوم بس يجيو يعايدوكو همّه ... يعني #غسيل_اموال القصة يخوان ... عشان هيك لازم تطلع ب اشي تستفيد منه يعني مثلاً عمتك يلي بتعمل حلو العيد زاكي ؛ بتروح عليها اول وحدة .. من الصبح ازرع حالك عندها زراعه ، اصلاً قبلها بيوم اعمل حفرة متر * متر بحوش دارها وتضل فيها لحد ما الشمس تطلع راسها ، وتعمل عليها زي المداهمه وتدق الباب بطريقة #خنفشارية غريبة ؛ لدرجة انو يطلع عليك زوجها بالشبّاح وعيونه منفخه وبحك بكرشو ووجهو اصفر شبة الزلمة يلي بكرتون #سيمبسون وبقولك بصوت دفش " شوو بدك ؟! "... شو شو بدك يجوز عمتي كل عام وانتو عاملين حلو ولله جاي على عمتي اسلم عليها ع بكير لانه اغلى وحدة علي .. وانت عارف الصح الله يسامحك ! وخالتك اللي طبخها زاكي ؛ بتروح عليها بوقت الغدا ، يُفضل يكون بين الضهر والعصر ... انسب وقت للطبخ عند الشعب الغزاوي ، واصلاً كل الشعب هكلان هَّم فترة العصر بالعيد من كثر الزهق .. ف منو بتغير جَّو ومنو بتقتل الزهق عند دار خالتك وبتشغلهم فيك ومش غلط تعملك #غفوة_صغيرة عندها يعني هيك ٦-٧ ساعات عالخفيف .. صدقني راح يحبوك حتى بالمطبخ فش ولا بنت بتدعي عليك صدقني ! وخالتك اللي جوزها معه شواكل وحياة سعيدة زي الاجانب " بتقدر تقول كل عيلة بكون فيه خاله زي هيك " ؛ هاي خليها للسهرة ، بتروح عليها معزز مكرم والكل فاضيلك هناك .. بتقعد شيخ عرب وخذلك من هالخيرات يلي بتنزل عليك .. حلو من هون ، فواكه من هون ، ارجيلة من هون ، رصاصة طايشه من هون ، #قذيفة_هاون من هون ... " ولا ولله يا خالتي ليش كل هالغلبه الله يسامحك خلص ناوليني سلّة الفواكه احطها عندي عشانك ولله ولا انا بحبهوش " ... يعني #اعتبرها_فندق وفترة راحة الك بعد يوم طويل .. دلّل نفسگ يا اخي ! ولو امك بتعرف تعمل حلو وطبخها زاكي ومعكو مصاري ... هاجرو هالفترة اطلع برا البلد احسنلكم وبما انك شب اكيد اكيد راح تيجي اللحظة اللي تصب فيها قهوة ؛ وراح تشوف الشخص يلي بتصبله قهوة وهو ماسك الفنجان بسولف وما بشرب ، وانت واقف قدامه زي #عامود_الظغط وناسي انك واقف ؛ ف امانه يرجل جهتك بالله وحلفتك برحمة امواتك انك تفقعو بالدلّه عصباحو وانعن قاع اللي نفضو جعل عمرو محدا عيَّد ... هالنوع هاظ بكون ملعون دير بالك منه ومش غلط لو ضربت #صحبة من ولاد الحارة الصغار .. تعال يحبيبي تعال اعلمگ #سحر ؛ هات المصاري يلي معك وشوف كيف راح اخليهم يختفوا بلحظات .... واااااااااااو عنجد عمّو وين المصاري كتير بجنن السحر ؛ وعشان تنسيه الموضوع وما يقولك بدي المصاري ، لعبو على تلفونك بفلترات السناب ، واسلخو صورة بفلتر الكلب عسناب شات خليه #يلتهي عن الموضوع ، وبس تروح من عندو نزل الصورة عالسوق المفتوح ؛ كلب #جعاري للبيع بسعر مغري ... وحط رقم ابوه ، وعيش يكبير بتكون امنت دخانك للاسبوع الجاي لانو لو ما اخذتهم انت راح يجي غيرك ياخذهم ، ف الموضوع هاظ بالذات بتكون انت في #غابة وقوانين الغابة صعبة .. لازم تكون #ذيب لانو القوي بوكل الضعيف .. والبنات انسى يمعلم ، عيديات بالكريك ، مصاري زي الرز ، بتحسها صارت زي الوليد بن طلال بملك فنادق بالعالم هو ناسيها وبعرفش عنها ، وهي زي هيك بتصير عندها مصاري من كثر ما بتخبي كل مجموعه لحال بتنسى وين خبتهم ... حقها معلم المصاري غيرتها خلص وثاني يوم بروحوا اهلك على القرايب يلي بعيدين عنكو ساكنين وانت ما بتروح معهم لانو راسك بوجعك شو مالك صرت ناسي يزلمه اه راسك بوجعك خلص افهم ،، وثالث يوم ورابع يوم للولاد الصغار بضلو يفقعو لمبات الشارع بفرود الخرز ينعن ابو هيك طفولة كلها اكشن وطخ ! وهيك بكون خلص العيد ؛ وجهزلي حالك عشان تداوم صيفي وتنزل عالفيس بوست تكتب الجو خليجي والرواتب صومالية ، واصلاً انت جنسيتك بتكون صومالية .. وبتكذب عحالك انك بدك ترفع التراكمي بالصيفي والمشكلة انك بتصدق هالكذبه وكلو عحساب صحتك .. الله يعينكم وكل عام وانتم بخير سلّف 🌹❤️ #عيد_الفطر #صلّة_الرحم #ايام_العيد #مصاري #حلو_قهوة #عادي_فوت_بالكندرة_عالسجادة #للمزح_فقط #مشمهم