وجاحده

-أنا ماما كانت بتحط الخرزانة جوا خرطوم الغسالة وتضربني بيها ..-وأنا ماما كانت بتضربني بعصاية المقشة لحد ما تتكسر عليا ..-أنا بابا كان بيلسعني بشمعة أو بسيجارة ع إيدي ورجلي ..-أمي كانت بتكسر الشماعة وتضربني بيها ..-أبويا كان عنده كرباج وبيلسوعنا بيه ...-ماما كانت تدخلنا الحمام وتفتح علينا الحنفية السخنة ..خشبة، شبشب، جزمة بكعب، شوكة سخنة، قلم ع الوش قدام الناس، خبط دماغ ف الحيطة، قرص ف أماكن حساسة، عض، تلطيش، إستخدام آلات حاده أحياناً، قص الشعر للبنات ..... وحاجات ووسائل تانية كتييييييييير!!أجيال كامله جواها جزء مشوه نفسياً بسبب أب أو أم فاكريين إنهم خلفوا عبد مش بني آدم حقهم يجردوه من كل المشاعر النضيفة ويستبدلوها بقسوة وجملة "أنا عملت كده عشان بحبك وعشان تتربى" فيطلعلنا أشباه رجال يضربوا مراتاتهم وبنات ضعيفة وشخصيات مهزوزة وقاسية وجاحدة .. أجيال طلعت مبتعملش الغلط عشان بتخاف مش عشان هو غلط فمجرد ما يروح الخوف "خلاص" ... أجيال طلعت مبتحبش أهلها قد ما بتخاف منهم .. غلطات وبلاوي بنقع فيها ونخرس ونحاول نساعد نفسنا بنفسنا عشان عارفيين إنكم لو عرفتوا مش هتقفوا جمبنا قد ما هتوبخونا وتلومونا وتذلونا مع إننا محتاجينلكم ... بقينا بنحترمكم خوف مش حب .. بقى قعادنا معاكم ع القد عشان عارفين هتقعدوا تفتكرولنا أي حاجة وتبكتونا عليها .. بتلومونا أما بنكبر إننا مبنحسش بيكم ف حين إننا كنا بنبات أيام وليالي بنبكي ونتألم وجسمنا يعلم من ضربكم لينا وإنتو ولا على بالكم ... إتقوا الله ف عيالكم عاقبوهم بحرمان من مصروف من لعب من خروج لكن مش بحرمان من آدميتهم .. بلاش تكبروهم ع شتايم وإهانة وضرب وتمصمصوا شفايفكم أما تلاقوهم بيردوا عليكم! متخلوش كل ذكرياتهم معاكم مؤلمة .. متخلوهمش يفتكروا الوحش بس لأنه أكتر من الحلو .. متطلعوش غلكم ولا عقدكم فيهم ..متكسروش قلب طفل.. عشان محدش فينا بينسى!قلبنا مش إسود، بس مبننساش!!! 😊