#spidermanintothespid...
مراجعة فيلم " Spiderman into the spider verse " " لا يوجد حرق لأحداث الفيلم " قصة الفيلم بكل بساطة بتتكلم عن مايلز موراليس الى بيتعض من عنكبوت و بيحصله زى إلى حصل لبيتر باركر إلى نعرفه ؛ و فى نفس الوقت بيتر باركر بيكون بيحاول يوقف مخطط لويلسون فيسك و لكن بيفشل و نتيجة للفشل ده زى ما واضح من إعلانات الفيلم أن بيجى اكتر من سبايدرمان من عوالم موازية ؛ و خلال أحداث الفيلم بيحاولوا الرجال العناكب دول أن كل واحد يرجع للعالم بتاعه و مايلز بيتعلم ازاى يبقى رجل عنكبوت و يتحكم فى قوته تحت اشراف بيتر باركر ؛ و بنتابع احداث الفيلم و كل الى انا قولته كلام سطحى جداااا بالنسبة للى موجود فى فى الفيلم ..... مميزات الفيلم : اول حاجة : الشخصيات .... الشخصيات كلها ممتازة حتى الى اول مرة نتفرج عليها و الى مدتها مش كبيرة على الشاشة لكن كل واحدة كان ليها دور و تأثير و محسوسة فى القصة الى بتتحكى ؛ و الأداء الصوت للنجوم الكبار الى مشاركين فى الفيلم كان ليه دور كبير فى التجسيد و أنهم يوصلولنا إبعاد الشخصيات دى . ثانى حاجة : الاخراج ... كاتجربة بصرية الفيلم مبهر و كمشاهد اكشن و دراما و الوان كل ده كان حلو جدا جدا جدا و عجبنى جدا شكل الفيلم العام و انك تحس انك بتقرا كوميك بوك مش بتتفرج على فيلم و حاجات تانية كتير هاسيبكوا تستكشفوها و تستمتعوا بيها . ثالث حاجة : الموسيقى التصويرية و الاغانى الى فى الفيلم كلها ممتازة و قوية جدا و دى اقل حاجة أقولها عنها لأنها أضافت كتير للفيلم . رابع حاجة : الفيلم ده بيدى كل واحد بيحب الكوميكس أو شخصية سبايدرمان بالتحديد أو الافلام عموما كل حاجة نفسه يشوفها لغاية لما يشبع منها و بالذات اللحظات الى تعد تعدها كتير بعد لما تتفرج سواء درامية او اكشن أو صعود بطل خارق . عيوب الفيلم : بالنسبالى العيب الوحيد هوا دافع الشرير و مخططه رغم انى عارف أن الدافع ده جاى من طابع الشخصية بس كنت حابب فى فيلم زى ده و احنا معانا كل الرجال العناكب دول يكون فيه حرب ليها هدف اقوى فى النهاية . فيلم " Spiderman into the spider verse " فيلم حلو جدا و من احسن افلام ٢٠١٨ بالنسبالى و من احسن افلام الكوميكس بكل تأكيد و متميز بأختلافه و ياريت كل الناس تشوفه .انا دخلت النسخة الإنجليزية و لسه هدخل النسخة المدبلجة لما اعرف بتتعرض امتى و لو لقيت حاجة مهمة ممكن تتقال عنها بالذات السبب إلى انا داخل عشانه انها بصوت تامر حسنى هاقول ساعتها . تقييمى للفيلم ...... ( 9.5 / 10 ) #KhaledEssamReviews #SpidermanIntoTheSpiderVerse
نسخ الرابط